Este mércores celébrase en Santiago a gala de entrega de premios Enreguéifate 2024

Este mércores 3 de abril, ás 11:00 horas, dará comezo no Teatro Principal de Santiago de Compostela a Gala Enreguéifate 2024. Trátase dun acto no que se entregarán os premios Enreguéifate, o certame de vídeos en liña de regueifas impulsado polos concellos de Ames, Carballo, Pontevedra, Santiago de Compostela e Teo e que pon o broche de ouro á súa sexta edición. Este ano presentáronse un total de 56 achegas audiovisuais, e doce destas creacións de improvisación oral recollerán o seu galardón nesta gala.
Este acto, que será accesíbel en lingua de signos, estará conducido polo mestre e músico Manolo Maseda, o mestre e escritor Séchu Sende, e as formadoras do Enreguéifate Lupe Blanco, Josinho da Teixeira e Nuria das Cruces. Tamén haberá música en directo da man da Orquestra da Regueifa, formada por alumnado do IES do Milladoiro de Ames e o IES Antonio Fraguas de Santiago de Compostela.
Así mesmo, na gala participarán, ademais das persoas premiadas, alumnado de varios centros escolares galegos, técnicas dos servizos de normalización lingüística e unha representación política dos concellos impulsores da iniciativa.
Coma en edicións anteriores, o certame contou con dúas categorías: unha xeral, para calquera persoa, e outra escolar, para o alumnado dos centros educativos galegos non universitarios; e cun total de seis premios en cada unha das categorías: á regueifa máis brava, á máis aguda, á máis diversa, á máis reivindicativa, á mellor cantada e á mellor falada.
O xurado estivo composto por Carme Pereiro, normalizadora lingüística do Concello de Carballo; Fátima Souto, do Servizo de Normalización Lingüística do Concello de Ames; Manolo Maseda, mestre, músico e regueifeiro; e Séchu Sende, mestre, escritor e regueifeiro. Valoraron un total de 56 regueifas, 47 delas inscritas na categoría escolar e 9 na xeral.
Estas son os vídeos gañadores, que poden verse na web do certame ou na canle de Youtube:
• A máis brava: Arrieiro e Chaminho Cumbia do choque.
• A máis aguda: Escola de Regueifa de Carballo. Vai de voda.
• A máis diversa: Teiseiros Regueifeiros. Regueifa pola saúde mental.
• A máis reivindicativa: Iván e Aroa. Regueifa de coidar a terriña.
• A mellor cantada: Grupo Xuvenil da Terceira Idade de Poio. Sempre vida.
• A mellor falada: As da Muiñeira. Os deberes.
Categoría escolar
• A máis brava: Os Máis Bravos. Queremos moito ás nosas profes. Alumnado do CEIP de Bormoio-Agualada (Coristanco).
• A máis aguda: Regueiferxs Da Chá. Regueifando apréndese mellor. Alumnado do IES Santiago Basanta Silva (Vilalba).
• A máis diversa: 2º B Quiroga Palacios. O noso Entroido. Alumnado do CEIP Pluringüe Cardeal Quiroga Palacios (Santiago de Compostela).
• A máis reivindicativa: 6º E.P. CEIPP Santa María do Castro. O granulado non é pasado. Alumnado do CEIPP Santa María do Castro, Cabo de Cruz (Boiro).
• A mellor cantada: Regueifeiras do Camballón. A nosa música na nosa voz. Alumnado do IES Marco do Camballón (Vila de Cruces).
• A mellor falada: Regueifeiros de Razo. Regueifa en Razo. Alumnado do CEIP Plurilingüe Nétoma-Razo (Carballo).
O xurado acordou ademais conceder un accésit á Regueifa máis inclusiva a Noa e Martín polo vídeo Todo isto son mentiras (IES Antonio Fraguas, Santiago de Compostela).