Este venres comezan en Santiago as segundas xornadas de informática xudicial

O CPETIG ten celebrado xa numerosas actividades ligadas á informática xudicial, entre as que se inclúen seminarios como o da imaxe

O Colexio Profesional de Enxeñaría Técnica en Informática de Galicia organiza, en colaboración coa Secretaría Xeral de Modernización, as II Xornadas de Informática Xudicial e Delitos Informáticos que se desenvolven en Santiago os días 11 e 12 de novembro. Con estes encontros, que se celebrarán por segunda vez en Galicia, póñense á disposición do ámbito xudicial e xurídico de Galicia relatorios de expertos que informen da realidade e experiencias en canto á relación da informática co seu contorno. Asemade, informa o CPETIG, quérese establecer unha xuntanza periódica que permita reunir e fomentar o debate entre os diferentes interlocutores do eido xudicial (maxistrados, xuíces, avogados, fiscais e peritos).
As xornadas, que terán lugar no Hotel AC Palacio del Carmen (Santiago de Compostela), contarán coa presenza, entre outros, do xuíz da Audiencia Nacional, Eloy Velasco, ou da Fiscal Xeral en Criminalidade Informática, Elvira Tejada de la Fuente.
Tipos de delitos informáticos
Perseguir a criminalidade informática no só é complexo dende o punto de vista operativo, senón tamén dende o marco legal, dado o extenso catálogo de delitos que hai neste eido. A instrución da Fiscalía Xeral do Estado enumera nove delitos en tres categorías segundo a importancia que teña o uso das novas tecnoloxías na súa comisión.
Nun primeiro apartado aparecen os delitos de danos, sabotaxe informático e ataques de denegación. Os delitos de descubrimento e revelación de segredos cometidos a través de Internet que teñan por obxecto datos que se atopen rexistrados en ficheiros ou soportes informáticos electrónicos ou aquelas revelacións que afecten a empresas.
Nun segundo grupo figuran aqueles que se serven das tecnoloxías para perpetrar o delito, e atoparíamos aquí as estafas que prexudiquen a un segundo, os delitos de acoso a menores de 13 anos, corrupción de menores ou pornografía infantil e propiedade intelectual. Finalmente atopamos os delitos do terceiro capítulo, nos que se requiren coñecementos informáticos para a súa comisión. Aquí estarían a falsificación documental, as inxurias e calumnias contra funcionario público, as ameazas e coaccións, a apoloxía ou incitación ao odio e aqueles contra a integridade moral.
Programa
As II Xornadas de Informática Xudicial e Delitos Informáticos contarán cun completo programa de relatorios e mesas redondas organizadas en dúas sesións. O venres 11 de novembro, os relatorios correrán a cargo do Maxistrado e Director do Servizo de Modernización e Organización Xudicial do Consello Xeral do Poder Xudicial, Joaquín Delgado Martín, e da Avogada e Socio Director de Razona Legaltech, Paloma Llaneza. A xornada completarase cunha mesa redonda titulada: ¿Estamos preparados para dar seguridade xurídica a un mundo xa dixital?
Durante a segunda xornada do ciclo, o sábado día 12, os relatorios correrán a cargo do xuíz da Audiencia Nacional, Eloy Velasco, da Fiscal Xeral en Criminalidade Informática, Elvira Tejada de la Fuente, e do inspector Xefe do grupo de Análise de Software da sección de Informática Forense da Policía Nacional, Jorge Martín García. A xornada completarase cunha mesa redonda titulada: Retos da xustiza ante a nova realidade informática.