Estoura a batería dun smartphone ZTE en Palma de Mallorca

Os casos de móbiles con baterías que esbouran son moito máis frecuentes do que queremos crer, e o último caso que busca gañar visibilidade é o dun rapaz de 15 anos que mentres esperaba a entrar á súa aula nun instituto de Palma de Mallorca veu como o seu ZTE Blade L5 Plus quecía e emitía un cheiro raro, e tras notar que estaba queimándolle o pantalón, sacouno (queimándolle os dedos) para ver como a batería estalaba no aire, sen chegar a tocar o chan, para logo comezar a arder.
Este caso foi denunciado por FACUA, asociación que advirte da gravidade do acontecido pois se o usuario non tivese sacado o móbil do peto podería ter importantes queimaduras. Trasladaron o caso á Axencia Española de Consumo, Seguridade Alimentaria e Nutrición (AECOSAN) e requiriron a ZTE información sobre as causas do ocorrido, así como que comuniquen se aconteceron máis casos semellantes.
O teléfono en cuestión mercárase o pasado 27 de maio a un prezo de 72,90 euros, e este incidente coñeceuse principalmente porque a nai do mozo que veu esbourar a batería do seu móbil é socia de FACUA, polo que púxose en contacto coa entidade para denunciar os feitos.