Estréase a rede social galega Vintecinco.com
venres, 31 de agosto do 2012
Aproveitando as vantaxes
do Proxecto Iniciativa Xove da
Xunta de Galicia, destinado a promover, entre outras cousas, o
desenvolvemento de proxectos de ocio e lecer educativo e espazos para a
comunicación que tiren proveito das TIC, cinco mozas e mozos galegos animáronse
a crear a rede social Vintecinco.com,
que se estrea o vindeiro 1 de setembro, e que xa leva un tempo funcionando en
probas.
Trátase dunha ferramenta
social moi similar a Facebook e Tuenti tanto nas súas funcionalidades como na
súa feitura, que tamén recolle ideas de Twitter, limitando os textos a 140 carácteres.
Javier, Óscar, Nadia,
Pablo e Manuel son os creadores desta nova rede social deseñada para a
comunidade internauta galegofalante, a cal poderá interactuar cos seus
contactos ben a través do muro ou ben a través dun chat que funciona de xeito
semellante a como o fai noutras redes sociais.
A plataforma permite
subir fotografías, vídeos, comentarios de estado e todo tipo de ligazóns de
interese para os seus usuarios, que logo poderán clasificar os distintos
contidos por categorías, tales como “Festa”,
“Universidade”, “Rede”, “Viaxes”, “Amigos”, “Tecnoloxía”, “Música”, “Películas”...
A maiores permite inserir
entradas a modo de blog, e mesmo seleccionar en tódalas categorías se o que
queremos visualizar é o noso
material, o de todos ou só o dos nosos amigos.
Malia todo a web aínda
está moi verde, e non ofrece demasiadas funcionalidades que poidan facela
despuntar por enriba das súas duras competidoras (Facebook, Tuenti e Twitter
principalmente), pero o tirón máis grande de orellas que lle hai que dar aos
seus creadores é por mor da falta do galego na fase beta, xa que só está
dispoñible en castelán e inglés; dende Código Cero agardamos que o vindeiro día
1 de setembro esta tara sexa unha mera anécdota da que falar mentres interactuamos
en Vintecinco.com.
A plataforma social vaise
dar a coñecer nas principais cidades galegas e nas tres Universidades do país
(Santiago de Compostela, A Coruña e Vigo), onde se entregarán folletos
informativos e se ofrecerán charlas, seminarios e cursos de balde con sorteos
de agasallos incluídos para as persoas participantes.