Europe Direct A Coruña achega aos concellos formación en liña para impulsar iniciativas europeas
luns, 19 de setembro do 2022
O
centro
Europe Direct A Coruña (Deputación da Coruña) programou dous
cursos de formación en programas europeos para o mes de outubro,
dirixidos a ampliar “a capacitación do persoal técnico dos
concellos da provincia da Coruña na xestión e deseño de proxectos
europeos e, así, atraer e impulsar novas iniciativas europeas no
territorio”. Nesta ocasión, a formación en liña centrarase no
programa Interreg de cooperación territorial da UE e o Corpo Europeo
de Solidariedade, unha liña do programa Erasmus Plus que promove os
voluntariados, formación ou axuda humanitaria entre a mocidade.
O
curso sobre o programa Interreg busca amosar ás entidades locais da
provincias as opcións existentes para avanzar na cooperación
territorial. Ao longo de cinco horas de formación, o persoal dos
concellos poderá coñecer as áreas de actuación de Interreg, os
requisitos e as esixencias para participar, os enfoques que deben ter
os proxectos e as últimas novidades do programa. Ademais, haberá
unha sesión a cargo da Oficina de Transferencia de Resultados de la
Investigación (OTRI) da Universidade da Coruña na que presentará
os seus servizos e tamén propostas de colaboración. Celebrarase os
días 3, 5, e 6 de outubro en horario de mañá.
A
formación sobre o Corpo Europeo de Solidariedade achegará a persoal
responsábel de centros de información xuvenil ou de políticas para
a mocidade unha visión práctica das accións que se poden
desenvolver neste programa. O programa abordará os proxectos de
mobilidade xuvenil e as súas prioridades temáticas, sen esquecer o
proceso de redacción, presentación e rexistro destas. O curso ten
unha duración de seis horas, divididas en tres xornadas en liña nos
días 18, 19 e 20 de outubro.
As
prazas para ambas formacións, que son gratuítas, están limitadas a
30 persoas e é imprescindíbel o rexistro.
Para
información complementaria, pódese contactar a través do correo
electrónico europedirect@dacoruna.gal, ou ben, no número de
teléfono 981 080 331.