ExpOtaku reforza a presenza dos vindeoxogos independentes

A vindeira edición de ExpOtaku na Coruña, que terá lugar os días 23 e 24 de maio no recinto de EXPOCoruña, volverá pór o foco na Zona Indie Dev, un espazo xa consolidado que reunirá talento galego e estatal arredor do desenvolvemento de videoxogos independente.
Tras o éxito da edición celebrada en novembro de 2025, a organización da ExpOtaku e a Asociación Koffi Games decidiron dar un novo paso adiante, ampliando a Zona Indie Dev ata os 40 postos expositivos, dez máis ca na convocatoria anterior. O obxectivo é claro: reforzar o papel da feira como escaparate e punto de encontro para estudios e desenvolvedores independentes, ofrecéndolles visibilidade ante milleiros de asistentes e a posibilidade de recibir feedback directo do público.
A Zona Indie Dev funciona non só como espazo expositivo, senón tamén como ferramenta de mellora e maduración dos proxectos. Moitos estudio atopan alí unha oportunidade para dar a coñecer os seus xogos, establecer contacto con xogadores e profesionais do sector e fortalecer a súa presenza no ecosistema do videoxogo.
ExpOtaku e a Asociación Koffi Games colaboran desde 2021. Como principal novidade da edición de maio de 2026, a convocatoria amplíase máis alá dos estudios de desenvolvemento, e poderán inscribirse tamén medios de comunicación especializados, publishers e centros de estudio, sempre que a súa actividade estea ligada ao desenvolvemento ou á difusión do videoxogo independente. Ademais, os medios interesados en realizar cobertura informativa poderán solicitar pases de prensa, independentemente de contar ou non cun espazo propio dentro da Zona Indie Dev.