FACUA denuncia unha fraude por WhatsApp

venres, 17 de xaneiro do 2014 Marcus Fernández

Nos últimos meses son moitos os usuarios de WhatsApp que están a recibir comunicacións fraudulentas a través das que instan a mandar mensaxes de texto a números de teléfono Premium, o que levou a FACUA-Consumidores en Acción a pór mans no asunto, polo que denuncian á empresa Ielobina Tradicional S.L. por enviar este tipo de mensaxes dende o número 25568, de xeito que, se o receptor responde mediante SMS deberá facer fronte a un custo adicional de tal mensaxe.
A denuncia presentouse ante a Secretaría de Estado das Telecomunicacións e para a Sociedade da Información (SETSI) e as autoridades de consumo de varias comunidades autónomas por considerarse que se trata dun fraude de publicidade enganosa.
Entre os cebos supostamente empregados pola empresa denunciada estarían textos como “Te estoy escribiendo por wasap. Dime si te llegan mis mensajes. Me agregaste el otro día?” ou “Será un fallo d mi móvil con el wassap. Xp no paro de enviarte la foto! La has visto? Pense k podría agregarte al face o wassap. O verte en smsduo Q hago?”, o que claramente é un engano ao consumidor, de aí que FACUA pida ás autoridades competentes a realización das dilixencias oportunas para instar ao cesamento destas prácticas para evitar os prexuízos económicos que poidan causar aos cidadáns enganados.
FACUA tamén recomenda aos usuarios que contestaran a este tipo de mensaxes que esixan á súa compañía de telefonía móbil que non lles realice o cargo do seu custo e que presenten denuncias ante a Oficina de Atención ao Usuario de Telecomunicacións do Ministerio de Industria e ante a autoridade de consumo da súa comunidade autónoma.

PUBLICIDADE