FEMUPO clausura o Proxecto Ás con 13 mulleres formadas no manexo profesional de drons

O pasado sábado 21 de xuño celebrouse en Pontevedra o acto de clausura do Proxecto Ás,unha iniciativa impulsada pola Federación pola Igualdade das Mulleres da Provincia de Pontevedra (FEMUPO) e financiada pola Deputación de Pontevedra, coa que se formou a un grupo de mulleres no uso profesional de drons.
Das 16 mulleres participantes seleccionadas, 13 completaron con éxito a formación, obtendo a acreditación oficial como operadoras de UAS (vehículos aéreos non tripulados) na categoría aberta A1/A3 e A2. “Este logro”, informou FEMUPO, “representa un paso importante cara á inserción laboral feminina en sectores tecnolóxicos fortemente masculinizados”.
O acto de peche contou coa presenza da deputada provincial de Igualdade, Sandra Bastos, que quixo acompañar ás asistentes ao curso nun día moi especial para elas, recoñecendo o seu esforzo e o valor deste tipo de programas para avanzar cara á igualdade real de oportunidades.
Durante a clausura fíxose entrega dos diplomas acreditativos e dos drons persoais a cada unha das mulleres formadas. Ademais, a xornada incluíu unha demostración práctica de voo, onde as participantes puideron amosar os seus coñecementos e habilidades en materia aeronáutica.
“Este proxecto é unha aposta pola igualdade, pola formación con futuro e polo apoderamento real das mulleres. Desde FEMUPO estamos orgullosas de seguir abrindo camiños onde antes había barreiras”, sinalaron desde a organización.
O Proxecto Ás ofreceu unha formación de 24 horas (16 horas de teoría, 4 de prácticas e 4 de exame), en colaboración con profesionais acreditados pola Axencia Estatal de Seguridade Aérea (AESA), e con accións formativas presenciais en Pontevedra e Tui. A entrega do dron ao finalizar o curso permite ás participantes continuar practicando e explorar oportunidades laborais ou de emprendemento neste sector en expansión.
Desde FEMUPO agradeceron á Deputación de Pontevedra “o seu compromiso co avance das mulleres, así como a todas as entidades e persoas colaboradoras que fixeron posible este proxecto transformador”.