FIFA Manager 14 será a derradeira entrega da súa serie

A finais de 2010 agardábase a chegada do xogo NBA Elite 11 para a campaña de Nadal, e a poucos días do seu lanzamento anunciouse que EA Sports tiraba a toalla, e ante a imposibilidade de conseguir un xogo que puidese competir dignamente con NBA2K11 preferiron non publicar o seu xogo de baloncesto anual; e agora parece que a historia repítese, e Gerald Köhler, fundador e deseñador da franquía FIFA Manager de EA Sports publicou unha carta aberta na que asegura que a súa derradeira entrega será FIFA Manager 14.
Köhler asegura que os xogos de xestión de equipos de fútbol convertéronse nun xénero moi sofisticado e especializado, que concentran os seus xogadores practicamente en dous países (Reino Unido e Alemaña) onde nos últimos anos foi outro xogo o que dominou o mercado, chegando a un momento no que, de ter que manter viva a franquía, terían que darlle un importante pulo cun novo motor e unha nova tecnoloxía de xogo en liña, o que sería unha aposta sumamente arriscada, de xeito que podemos dicir que FIFA Manager recoñecer verse derrotado polo Football Manager.
O responsable da franquía iniciada en 2002 aproveita a ocasión para agradecer aos seus seareiros o apoio dos últimos anos, asegurando que intentarán manter a presenza na Rede do FIFA Manager o máximo posible, aínda que o feito de que a súa última entrega rece na súa portada que se trata dunha Legacy Edition deixa claro que o xogo carece da confianza do seu editor (tal advertencia indica que se trata dunha versión vella do xogo á que limitáronse a actualizar os datos do mesmo, como os cadros de xogadores nos distintos equipos).