FX lanza un máis que completo simulador de trens

FX Interactive está a presentar estes días un xogo que fará as delicias de todos aqueles que, coma os protagonistas da moi recomendable película The Station Agent, andan á caza dun mundo en constante movemento e que, en ocasións, vese mellor dende fóra que de dentro: o mundo dos trens. O xogo en cuestión chámase Trainz 12, e trátase dun simulador ferroviario, en palabras de FX “o máis completo do mundo, agora en español”. A achega, que como todos os produtos de FX ten un prezo asumible (desta volta son case 20 euros, pero con regalos a ter en conta), non vén soa. De feito, inclúese a actualización SP1, desenvolvida polos creadores do xogo ao longo do último ano, e de agasallo outro xogo: Take on Helicopters (PDF).
A novidade da que estamos a falar permítenos, entre outras cousas, deseñar e construír todo tipo de infraestruturas “con total liberdade e máximo realismo” (vías, pasos a nivel, estacións, pontes, túneles, edificios, ríos, montañas, estradas) e botar man dunha listaxe de 50 modelos de trens que, segundo apunta FX, son un percorrido pola historia do ferrocarril (hai locomotoras eléctricas e a gasóleo, de alta velocidade e máquinas a vapor).
Tamén se nos pon ao alcance da man un simulador que nos permite converternos en profesionais do ferrocarril manexando os paneis interactivos que reproducen os controis reais de cada un dos vehículos. O xogo incorpora, tamén, o modo multixogador, dirixido a ofrecernos a posibilidade de compartir a paixón polo eido do tren con seareiros de todo o mundo.