Fálame de San Sadurniño acada un premio europeo polo seu traballo a prol do envellecemento activo

Finalmente o proxecto colaborativo Fálame de San Sadurniño, unha iniciativa desenvolvida ao abeiro da aula CeMIT local, vén de recibir un importante recoñecemento no certame europeo ACting, cuxa participación adiantamos o pasado verán dende Código Cero, salientando que se trata dunha iniciativa (ACting) para visualizar e salientar proxectos de envellecemento activo a través das TIC. Fálame de San Sadurniño foi seleccionado para o concurso entre unha ducia de achegas. A final do certame vense de desenvolver en Xenebra, Suíza. O proxecto galego é unha actividade colaborativa na que participaron unhas 230 persoas (sobre todo persoas maiores) e que se materializou nun blog de seu, nunha canle de YouTube e en diferentes presenzas nas redes sociais. O obxectivo de todo isto foi dar a coñecer perante o mundo o dito concello galego a través de quen mellor o coñece, os seus veciños.
Carmen Suárez, responsábel da Aula CeMIT de San Sadurniño e principal impulsora de Fálame..., declarou trala concesión do premio que a preselección para a final xa fora recoñecemento máis que dabondo. Porén, o premio rematou por converter o concello como un referente internacional sobre como conseguir que a xente de máis idade entre formar parte dun mundo dominado polas TIC.
ACting, como lembraremos, iniciouse hai dous anos con financiamento comunitario e coa participación de proxectos de catro países: España, Romanía, Italia e Suíza. O obxectivo do ACTing foi o de analizar e por a proba novos métodos de traballo no campo da inclusión tecnolóxica das persoas maiores, nun contexto en que só o 42% da poboación europea maior de 55 anos usa regularmente a Internet. Neste sentido, o traballo do ACTing centrouse en ver experiencias sobre como ensinar a usar a tecnoloxía pero, sobre todo, en coñecer fórmulas para que a xente maior experimente e integre as novas ferramentas na súa vida diaria.
Segundo lembran fontes do Concello, o xurado reuniuse o mércores 23 en Xenebra para repasar as candidaturas e pouco despois do mediodía coñeceuse o seu fallo, dando como vencedora do concurso a Fálame de San Sadurniño. Os puntos que se valoraron foron o do grao de innovación, a creatividade, as tecnoloxías empregadas, a utilidade social, o impacto, a metodoloxía e a visibilidade da iniciativa. O premio recollérono Carmen Suárez e dúas das participantes máis veteranas de falamedesansadurnino.org, Cruz Piñón e Consuelo Picos.