Falece Alfonso Azpiri, un dos principais creadores de portadas de videoxogos españois

A finais dos anos 80 a industria española do videoxogo vivía toda unha idade de ouro, con compañías como Dinamic, Topo e Opera publicando xogos para os ordenadores domésticos da época (principalmente os equipos de 8 bits ZX Spectrum, Amstrad CPC, MSX e Commodore) e ante a reducida resolución gráfica dos ordenadores daqueles tempos as compañías tiñan que apostar por impresionantes ilustracións de portada que non só fixesen de reclamo para os consumidores, senón tamén para nutrir a súa imaxinación con imaxes que achegasen os detalles que non se podían amosar no xogo.
Temos así como nesa época gloriosa destacaron figuras como Luis Royo, Juan Giménez e Alfonso Azpiri, destacando especialmente este último grazas ao seu traballo para xogos tan representativos como Army Moves, West Bank ou Abu Simbel Profanation, de aí que en 2009 editasen un libro titulado Spectrum que recolle os seus traballos para a industria dos videoxogos, e que actualmente é toda unha xoia difícil de atopar ao seu prezo orixinal de 14,95 euros, pois é toda unha peza de colección.
Por desgraza, aínda que a obra permaneza, non pasa o mesmo co artista, e esta tarde deixounos Alfonso Azpiri, pasamento que está a chorar boa parte das industrias da banda deseñada e dos videoxogos, xa que en ambos eidos deixou un grato recordo na memoria de moitos españois, xa sexa por ter xogado a algún dos xogos de 8 bits aos que puxo portada como por ter lido as súas historietas (entre as que destacan os cómics infantís de Mot publicados inicialmente en El Pequeño País e a serie para adultos de Lorna y su robot) de aí que non sorprenda que Azpiri chegase a figurar como tendencia en Twitter.