Fernando Suárez, membro do comité técnico do cuarto Congreso Cidades Intelixentes
luns, 22 de xaneiro do 2018
O director de Transparencia e Goberno Aberto da
Deputación de Ourense, Fernando Suárez, de
cuxa recalada na entidade provincial falamos os días pasados dende
Código Cero, vén de ser designado
membro do comité técnico do IV Congreso Cidades Intelixentes.
Trátase, segundo informa a Deputación, dun referencial cumio sobre
tecnoloxías smart aplicadas á vida pública das cidades,
abranguendo (e impulsando) cuestións de relevancia tal como a
transparencia, o goberno aberto, a Administración Electrónica, a
sustentabilidade, a eficiencia na xestión ou a participación
cidadá. O cumio celebrarase o mes de maio en Madrid.
O presidente da Deputación de Ourense, Manuel
Baltar, felicitou a Fernando Suárez por esta designación (en
calidade de vicepresidente do Consello Xeral de Colexios de Enxeñería
en Informática), para formar parte do comité técnico do congreso,
integrado por representantes de alto nivel da Administración
Pública, colectivos profesionais e as institucións máis
representativas no ámbito das Cidades Intelixentes en España.
O congreso terá lugar os días 30 e 31 de maio no
Espazo La N@ve de Madrid. Trátase, segundo engade a Deputación “dun
encontro que potencia o intercambio do coñecemento e experiencias
sobre as cidades intelixentes coa tecnoloxía e a innovación como
ferramentas base do seu desenvolvemento”. Esta cuarta edición,
baixo o lema Da cidade ao Territorio Intelixente: unha evolución
necesaria, abrangue temáticas como a innovación social e a
participación cidadá; os destinos turísticos intelixentes; os
núcleos e territorios rurais intelixentes; a economía baseada no
coñecemento, a información a gran escala (Big Data) e a xestión
intelixente.