Ferrol crea o rexistro de convenios para seguir avanzando en dixitalización e transparencia

O Concello de Ferrol contará cun Rexistro de Convenios, así o aprobou este luns 11 de agosto a xunta de Goberno que deu luz verde, tamén, ás directrices para a ordenación e coordinación da actividade convencional da Administración local. O obxectivo é ter “un tratamento unificado que favoreza a ordenación e racionalización desta actividade convencional da entidade local e que garanta en todo momento a constancia e vixencia dos convenios subscritos”.
Trátase dun rexistro público de carácter administrativo que, por unha banda, deixa constancia do outorgamento dos convenios e, por outro, é o instrumento para facer pública, en aplicación do principio de transparencia na xestión administrativa, a información dos convenios. Así deberán inscribirse no Rexistro de Convenios: os contratos administrativos ou privados, os convenios urbanísticos ou en materia expropiatoria, os convenios de inclusión con particulares en materia social ou similares, os convenios para a realización de prácticas e outros en que de forma motivada, ao amparo da Lei, así se dispoña polo órgano competente.
Estará baixo a dependencia da Oficialía Maior como órgano de apoio a Xunta de Gobierno, correspondendo á mesma a súa organización, dirección e xestión. Este rexistro terá formato electrónico e será de acceso universal e consulta pública a través da sede electrónica municipal.
Na actualidade, só existe no Concello de Ferrol o Rexistro e Arquivo administrativo dos Convenios Urbanísticos, que se configura como un rexistro específico e diferenciado do Rexistro de Convenios.