Ficción Producións amosa a súa aposta tecnolóxica para gravar produtos audiovisuais sobre fondos virtuais

O grupo galego Ficción Producións vén de amosarnos en todo detalle o seu traballo de innovación audiovisual no eido da realización, un traballo que, a xuízo dos responsábeis da empresa, vaille permitir competir no ámbito internacional con todo tipo de alardes técnicos. Máis polo miúdo, a aposta tecnolóxica de Ficción baséase en facer posíbel a gravación/filmación de calquera produto sobre fondos virtuais. Os equipos que van facilitar esta liña de traballo, adquiridos en boa medida grazas á axuda da Consellería de Economía, porán á nosa terra na vangarda do emprego destas novas tecnoloxías, informa a empresa.
Estes sistemas foron dados a coñecer en detalle este luns na sede de Ficción Producións, presentación na que fixeron acto de presenza a directora da TVG Rosa Vilas, o director da Axencia Galega de Industrias Culturais, Juan Carlos Fasero, ou a directora de Área de Crecemento e Valorización da Axencia Galega de Innovación, Pilar Morgade. Os encargados de debullar o alcance desta iniciativa de innovación foron o director xeral e a directora xerente de Ficción Producións, Julio Casal e Mamen Quintas (respectivamente), que explicaron que o miolo daquela é un sistema de captura de movemento en tempo real por cámaras de infravermellos de última xeración, que permite ao mesmo tempo a realización (tamén en tempo real, sinalaron) de traballos audiovisuais sobre fondos virtuais mediante unha cámara Optitrack, compatíbel coa captura de movementos, e o Triscaster. Este último, engadiron, posibilita o control da realización sobre os devanditos fondos.
Polo que respecta á captura de movemento, explicaron que se trata do proceso de detección da actividade dos actores/actrices e o posterior traslado desta a un modelo dixital, ou sexa, a un computador, onde se gardan as accións dos actores/actrices para animar logo modelos dixitais co software Motion Builder. Con este programa, explicaron, “será posible integrar estes movementos cos seus personaxes en escenarios concretos; e coa cámara Insight VCSPro de Optitrack, Ficción poderase facer ao mesmo tempo a captura de movementos de cámara asignándoos en tempo real a unha cámara do contorno virtual xunto co escenario e os personaxes, dotándoo de maior realismo á escena”.
Este control de realización portátil pode traballar en tempo real con oito sinais de vídeo externas e 4 internas (HD/SD). Ademais, explicaron Julio Casal e Mamen Quintas, “o sistema ofrece unha amplísima gama de printers na tituladora integrada, que o converten nunha ferramenta inmellorable para a realización, personalización e gravación en directo de programas de TV, concursos, informativos, eventos deportivos, etc…”
Primeiro produto multiplataforma
No transcurso da presentación, Julio e Mamen tamén achegaron un adianto de vindeiros lanzamentos e proxectos, como por exemplo o seu primeiro produto multiplataforma, que se vai subministrar en breve baixo a marca TUTÚ, composto por un pack de 5 xogos educativos con cadanseus 3 niveis, que vai destinado sobre todo ao público de preescolar para Iphone e Android, plataformas portátiles Ipad e Samsung e pantallas táctiles educativas, “cuxa homologación nas devanditas plataformas foron xa superadas satisfactoriamente”, puntualizaron.