Filtran 1,1 TB de datos de Disney en protesta polos abusos da IA

Un grupo hacktivista chamado Nullbulge vén de filtrar máis dun terabyte de datos supostamente extraídos das canles de Slack de Disney, onde figuran credenciais de acceso, código, imaxes e información de proxectos aínda non lanzados.
Ao parecer, terían vulnerado a seguridade dun traballador de Disney, e descargaron 1,1 TB de ficheiros e mensaxes de máis de 10.000 canles de Slack, onde podemos atopar información sobre o desenvolvemento de software, a contratación de persoal, o mantemento de páxinas web... e incluso informacións sobre videoxogos (como futuras colaboracións en Fortnite ou a secuela de Aliens: Fireteam Elite).
Os responsables desta filtración aseguran estar motivados polo maltrato de Disney aos artistas, moi especialmente no que se refire á súa relación coa intelixencia artificial, e aseguran que os seus ataques non son maliciosos, senón que simplemente serían un castigo simbólico polo que consideran agresións aos dereitos dos artistas.