Fíltrase á Rede unha copia de Resident Evil 5 antes do seu lanzamento

O vindeiro día 13 chegará ás tendas de videoxogos europeas o agardado Resident Evil 5, que promete ser, xunto con Street Fighter IV (curiosamente tamén de Capcom), un dos meirandes éxitos de vendas da primeira metade do ano para Xbox 360 e PlayStation 3, pero o arranque deste título podería ser menos forte do agardado porque xa se filtrou á Rede por parte dun grupo que responde ao nome de KFC unha copia do xogo para Xbox 360 que correspondería á versión norteamericana (que está libre de protección rexional).
Estariamos ante un caso máis no que habería que instar aos editores dos xogos a coidar mellor os seus títulos para evitar a súa filtración, pois o feito de que sexa posible conseguir ilegalmente un xogo antes do seu lanzamento desvirtúa o produto final, xa que os usuarios máis fieis mesmo reservan os xogos con antelación non son os primeiros en gozar dos mesmos, o que resulta moi inxusto e podería minar á Industria a longo prazo.