Flappy Bird abandona as tendas de aplicacións

A poucos días de salientar o éxito do xogo Flappy Bird para iOS e Android temos que dar conta da desaparición da aplicación das tendas en liña oficiais, pois o seu creador, Dong Nguyen, pese a estar a ingresar 50.000 dólares ao día en publicidade a través do xogo, non soubo levar ben a atención que estaba a recibir por mor deste fenómeno de moda, e decidiu retirar o eu xogo do mercado.
Estamos ante unha decisión que non afecta ás máis de 50 millóns de descargas do xogo, senón limítase a pechar a porta a novos usuarios, coa intención de afastar a vista do creador do xogo, que en ningún momento buscou a atención mediática. Aínda que Nguyen admite que Flappy Birds foi un éxito persoal, di que o seu xogo arruinou a súa vida sinxela, polo que agora ódiao; pero tamén detalle que seguirá a desenvolver videoxogos.

Probablemente o máis rechamante do éxito de Flappy Bird é que trátase dun xogo de pouca calidade (desenvolveuse en 3 noites fóra no tempo libre do seu creador), que levaba 9 meses nas tendas de aplicacións, e que conseguiu repercusión por terse convertido nun fenómeno viral, chegando a xurdir numerosos xogos que o clonan (algo que resulta bastante absurdo, pois estamos ante un título de balde e que pertence a un xénero no que hai moitos outros xogos dunha factura moi superior).
Como curiosidade, agora que é efectiva a desaparición oficial de Flappy Bird, en eBay están a pór á venda smartphones co xogo instalado a prezos ridículos (no que claramente corresponde a ofertas feitas de broma, pois pagar 90.000 dólares por un iPhone 5 non resulta moi crible).