Fotolingua, o certame para visualizar os usos comerciais do galego, xa ten gañadores
martes, 11 de xuño do 2019
Xa
hai gañadoras e gañadores da cuarta edición do certame de
fotografía a prol do galego que lanzou o Concello de Santiago, o
certame Fotolingua. Segundo
fai saber o Goberno local en funcións, o concurso pechouse con 441
imaxes asociadas ao cancelo #fotolingua, todas elas co nexo común
de mostrar diferentes xeitos de facer mercadotecnia comercial a
través do galego. Destas imaxes, a que recibiu máis gústame
do público, 180, foi a realizada por Raquel Pombar na escola
Sondanza.
Pola
súa banda, a organización do certame decidiu premiar a Xaime Varela
Siero “polo conxunto de imaxes que publicou no que reflicte a
riqueza e variedade de establecementos que usan o galego en
Compostela”.
Este
ano, foron un total de 229 imaxes únicas as que se subiron ás dúas
redes empregadas no certame, Facebook
e Instagram,
e que cumprían todos os requirimentos das bases do concurso. A
maiores, publicáronse outras 12 que non puideron optar a premio
porque incumprían as bases.
Segundo
explica o Concello, a consolidación definitiva do concurso, ao
abeiro desta cuarta edición, deixouse notar non só na cifra de
participantes, senón tamén no incremento de seareiros e seareiras
na súa
páxina de Facebook, que sumou 334 este ano até chegar a 1.400
persoas. Ademais, o número de impresións nas redes achegouse ás
12.300.
Imaxes
premiadas
A
imaxe que conseguiu máis votos positivos dos usuarios das redes
sociais foi, como dixemos, a compartida por Raquel Pombar, que
fotografou unha parte do alumnado da escola Sondanza diante do
centro, no barrio de Conxo. A segunda posición foi para Manolo
Villaverde, por unha imaxe do restaurante Antollos, da rúa das
Orfas, subida a Facebook; e o terceira imaxe máis valorada polo
público foi a subida a Instagram pola usuaria @arancharf no
Restaurante Rúa.
Pola
súa banda, a organización de Fotolingua acordou premiar a Xaime
Varela Siero, “polo conxunto de imaxes que publicou de diferentes
establecementos que usan o galego en Santiago”, e tamén “por ter
participado no concurso dende a súa primeira edición”.