FreedomPop ofrecerá en España telefonía móbil de balde a partires do verán

Tras o seu paso por EE.UU. e Reino Unido, o operador de telefonía móbil FreedomPop anunciou que está a preparar o lanzamento do seu servizo de telefonía móbil de balde en España, que durante os vindeiros días iniciaría o seu período de probas para comezar a funcionar de xeito ordinario no verán. Este servizo ofrecerá chamadas de voz e datos, destacando por contar con roaming de balde en 31 países (entre os que están EE.UU., Reino Unido, Alemaña, Francia, Portugal e Italia).
Cómpre destacar que estamos ante un servizo paseado principalmente en redes de datos, que parte dun plan de balde, pero que facilita a contratacións de plans de pagamento (que son os que sosteñen o negocio). Deste xeito FreedomPop pode presumir de chamadas e mensaxes de texto a través de Wi-Fi dende calquera lugar, chamadas e mensaxes ilimitadas entre teléfonos da compañía, chamadas internacionais de balde a máis de 60 países, a posibilidade de contar con número de teléfonos virtuais en distintas partes do mundo e a posibilidade de facerse con datos recomendando o servizo a amigos e aceptando ofertas de patrocinadores do servizo.
En EE.UU. FreedomPop funciona baixo a rede 4G de Sprint, ofrece de balde até 200 minutos de voz (que van a través de redes de datos), 500 mensaxes de texto e 500 MB de datos, mentres que por 10,99 dólares/mes ofrece voz e mensaxes sen límite e 500 MB de datos, mentres que os que paguen 19,99 dólares/mes gozarían de 1 GB de datos. Estamos así ante uns plans que resultarían rendibles para uns perfís de usuario moi determinados, pero que no caso español gozarían dun detalle que si faría que a oferta de balde da compañía fose especialmente atractiva, xa que o tráfico de datos a través da aplicación de WhatsApp (tanto mensaxes como chamadas) serían de balde, ou sexa, non computarían dentro do límite de datos mensual de FreedomPop, o que para moitos usuarios faría que este operador fose virtualmente de balde.
Steven Sesar, co fundador de FreedomPop, asegura que o seu servizo de balde no Reino Unido está a ter unha aceptación moi boa (con máis de 100.000 usuarios en menos de 12 meses) e confían en que en España a situación sexa moito mellor, de xeito que o seu obxectivo é conseguir entre 500.000 e un millón de usuarios en dous anos.
O servizo de FreedomPop está baseado no uso das súas tarxetas SIM (para ter datos móbiles) en combinación coa súa aplicación oficial para iOS e Android, aínda que dende a compañía destacan que o servizo tamén é compatible con tabletas (o que pode ser un incentivo para empregar esta solución de comunicación que permitiría levar o noso número móbil alí onde teñamos acceso á Internet dende un trebello con iOS ou Android).