Fujifilm dobra a produción da X100VI para tender a súa elevada demanda

Hai poucos meses demos conta do lanzamento da cámara Fujifilm X100VI, que chegaba cunha estática clásica e grandes prestacións, buscando basicamente manter activa unha liña de cámaras que sorprendentemente se converteu nun símbolo de status entre influentes.
Se ben a Fujifilm X100V foi un éxito inesperado, o feito de que se estivese sobre aviso non serviu para que a X100VI sexa actualmente unha cámara case imposible de conseguir, ao non ser o fabricante quen de satisfacer a súa demanda actual, rexistrándose na meirande parte de tendas de fotografía listaxes de agarda para facerse cun dispositivo cun prezo de 1.799 euros, que non deixa de ser unha cámara compacta cunha focal fixa de 23 milímetros f/2 (existindo obxectivos para convertela ao equivalente a 28 e a 50 milímetros).
Aínda que sobre dicir que a cámara saca instantáneas moi superiores ás de calquera smartphone (o seu sensor de 40,2 Mpíxeles conta con tecnoloxía de procesamento de imaxe avanzada e capta moita máis luz que calquera sensor dun teléfono) e pode mesmo gravar vídeo até a 6,2K, o seu grande atractivo é que se puxo de moda entre creadores de TikTok, converténdose nun produto aspiracional para mozos de pouco máis de 20 anos que noutros tempos nin sequera se lles pasaría pola cabeza a adquisición dunha cámara deste tipo (máis propias de consumidores de máis idade). Conseguiuse que callase a idea de que ter unha cámara elegante axuda a animarse a saír a utilizala, gañando moito peso como accesorio de moda.
Ao igual que en 2023 a X100V fixo que a división de fotografía pasase de ocupar o 27% dos ingresos da compañía ao 37%, en 2024 a cousa non parece ser moi distinta, a Fujifilm xa anunciou que tivo que dobrar a produción da X100VI, recoñecendo que os pedidos superaron por moito as previsións iniciais da empresa.
O éxito das X100 de Fujifilm tamén está a ter un impacto moi positivo nos seus competidores, que lanzaron varios modelos de cámaras semellantes nos últimos meses, conseguindo así captar a consumidores ansiosos que non eran quen de conseguir unha X100 nin no mercado de segunda man.