GAIN e CLUSAGA abren o prazo para presentar proxectos á aceleradora BFood, sexta edición

martes, 3 de outubro do 2023 S. P.

A iniciativa Business Factory Food (BFFood), a aceleradora vertical do sector alimentario de Galicia impulsada pola Xunta de Galicia e dinamizada polo Clúster Alimentario de Galicia (CLUSAGA), vén de abrir o prazo de presentación de proxectos para optar a formar parte da súa VI edición. O proceso de recepción de candidaturas pechará o 15 de novembro ás 14.00 horas.
Das propostas presentadas a esta convocatoria seleccionaranse ata 16 proxectos innovadores de emprendemento, tanto nacionais coma internacionais, que dean resposta aos retos da industria alimentaria galega, boa parte deles tecnolóxicos e disruptivos.
BFFood ten impulsado, ao longo das súas cinco edicións previas, 61 proxectos das 288 candidaturas recibidas, tanto desde España coma desde fóra do continente europeo. Nesta nova edición escollerá ata dez iniciativas para o seu programa de aceleración e ata seis para o de consolidación.
BFFood está xestionada por un consorcio liderado por CLUSAGA que, ademais, conta coa participación das tres universidades galegas, AGACA, ANFACO CECOPESCA e FEUGA no seu comité técnico. A actividade da aceleradora de emprendemento, posta en marcha en 2019, permitiu a creación de 26 novas compañías e a xeración de 200 empregos cualificados.
As startups, entidades e empresas que teñan unha idea innovadora poden presentar a súa candidatura a unha das dúas modalidades de BFFood.
A modalidade de aceleración, de nove meses de duración, ofrece apoio integral e especializado no sector alimentario para iniciativas emprendedoras na súa fase inicial, que estean desenvolvendo un produto ou servizo mínimo viable e esbozando un modelo de negocio, e non teñan máis de cinco anos de antigüidade.
A modalidade de consolidación, de doce meses de duración, ofrece apoio integral e especializado no sector alimentario para empresas xa constituídas, cun produto ou servizo definido e aliñado con algún dos retos do sector, e cuxa antigüidade sexa de máximo sete anos.
Para ambas modalidades, BFFood ofrece adestramento (coaching), formación especializada, acceso a infraestruturas científico-técnicas e servizos avanzados, mentoring dos líderes do sector, financiamento directo e acceso a investimento, así como a unha rede de netoworking no ecosistema de innovación alimentario.
Retos propostos
BFFood busca impulsar e consolidar aqueles proxectos innovadores que dean resposta aos principais retos propostos polas empresas do sector da alimentación: dixitalización e automatización; rastrexabilidade (trazababilidade), calidade e seguridade alimentaria; loxística; sustentabilidade; desenvolvemento de novos produtos; e innovación de procesos e comercialización.
Os proxectos seleccionados na sexta edición de BFFood disporán do apoio económico da Xunta de Galicia. En concreto, os proxectos do programa de aceleración poderán acceder a un financiamento de 25.000€ a fondo perdido por parte de GAIN, así como a un préstamo participativo de ata un máximo de 50.000€ a través de XesGalicia. Os proxectos do programa de consolidación poderán acceder a un préstamo participativo que podería implicar unha opción de capitalización de ata un máximo de 250.000€ por parte de XesGalicia.
Cada proxecto seleccionado contará cun ou máis mentores específicos, pertencentes a unha das empresas tractoras de BFFood. Estas ocuparanse de conducir a súa evolución e guialos no seu desenvolvemento, facilitando o aliñamento da proposta de valor coa resolución do reto.
Nesta VI edición, as empresas mentoras de BFFood son Bodegas Martín Códax, Cafés Candelas, Calvo, Clavo Food Factory, CEAMSA, CONGALSA, CLUN, Gadis, Galacteum, Kiwi Atlántico, ALS Laber, DS Smith, Grupo Lence, Grupo Pereira, Larsa, Nueva Pescanova, Quescrem, Torre de Núñez, Viña Costeira, Vegalsa, Casa Grande de Xanceda e Hijos de Rivera.

PUBLICIDADE