GAIN mostra o seu apoio á plataforma ZERØ de Teimas Desenvolvemento
xoves, 26 de setembro do 2019
Teimas
Desenvolvemento, empresa tecnolóxica galega con sede en
Santiago, vén de situarse entre as firmas beneficiadas co
Préstamo IFI Innova a proxectos innovadores que conceden a axencia
GAIN e o IGAPE. Teimas, que centra boa parte da súa actividade
na creación e comercialización de solucións software e hardware
para o sector da recuperación e a reciclaxe, é unha empresa en
proceso continuo de medre e expansión, unha liña estratéxica que
colle corpo, principalmente, a través de acordos con entidades e
empresas interesadas en poñerse á vangarda da sustentabilidade
ambiental con tecnoloxías avanzadas. Entre estas últimas sitúase a
nova plataforma dixital ZERØ, desenvolvida por Teimas e, grazas ao
devandito apoio de GAIN e o IGAPE, collendo impulso para o seu gran
chimpo internacional.
A
nova plataforma dixital ZERØ responde ao compromiso de Teimas coas
contribucións innovadoras que favorezan a economía circular nas
empresas. “Con esta ferramenta”, sinalan dende a empresa
compostelá, “as compañías poden dar un paso máis nas súas
estratexias de sustentabilidade, contribuíndo aos Obxectivos de
Desenvolvemento Sustentable (ODS) da Axenda 2030 de Nacións Unidas”.
Este
novo proxecto de Teimas será presentado en ISWA 2019, congreso
internacional que se celebrará en Bilbao do 7 ao 9 de outubro 2019,
enfocado na xestión sustentábel de residuos, a economía circular e
a eficiencia dos recursos.
O
Préstamo IFI Innova
Este
financiamento establece varias categorías para os sectores
prioritarios da Axencia de Competitividade Galicia Industria 4.0.
Teimas concorreu nos apartados de Eliminación, valorización ou
reciclaxe de residuos e en Servizos e desenvolvemento de
software.
Segundo
as bases da convocatoria, poden optar aos préstamos PEME de alicerce
tecnolóxico pero tamén aquelas que, contando cunha traxectoria
contrastada, desexen emprender proxectos de innovación en calquera
sector de actividade. Neste último caso atópase a empresa de
Santiago, co seu proxecto zerotheplatform.com.
Que
é ZERØ?
Teimas
cóntanos que a plataforma abrolla directamente da súa longa bagaxe
en tecnoloxías avanzadas para a sustentabilidade, o que lle permitiu
detectar novas necesidades e demandas dentro dun mundo empresarial
que se mostra, nas súas palabras, “cada vez máis preocupado pola
súa pegada ecolóxica e está comprometido con o medio ambiente”.
De aí que a empresa de Santiago decidise dar o paso (“un paso de
xigante”) coa materialización desta ferramenta que, basicamente,
simplifica e axiliza o chimpo das empresas á chamada “economía
circular”. Trátase pois dun recurso concibido para a gran empresa
que busca converter a xestión de refugallos en datos cualificábeis
en termos de reutilización, valorización ou reciclaxe.
“Estamos
ante a solución máis ambiciosa de Teimas”, sinalan fontes da
firma, engadindo que o financiamento obtido de GAIN e o IGAPE
permitiralle seguir medrando: “Con este financiamento
desenvolverase o potencial do proxecto ZERØ, ampliando as súas
capacidades e eficacia”. Neste senso, todas as novidades que se
introducirán na plataforma teñen o nexo común de axilizar o seu
uso, ampliando a capacidade de control e a emisión de información
aos clientes.
Entre
as vertentes que máis se valoraron á hora da selección para os
financiamentos, salientan cuestións propias do produto como “o
grao de sustentabilidade”, a innovación, ou a estratexia
comercial. Asemade, tívose en conta a súa proxección a nivel
social en vertentes como a contribución de novos mercados e
potenciación da exportación.