GTA: Vice City estréase na App Store

venres, 7 de decembro do 2012 Marcus Fernández

Dende onte xa está dispoñible como aplicación universal para iPhone e iPad o xogo Grand Theft Auto: Vice City, que celebra o seu 10º aniversario co seu salto a dispositivos móbiles, mellorando tamén os seus gráficos para adaptarse ás posibilidades dos nosos trebellos, como tamén fai co seu sistema de control. O xogo está á venda por 4,49 euros e ofrece as mesmas posibilidades que a súa versión orixinal para PC, de xeito que garante moitas horas de xogo, á vez que tamén permite adaptar o control aos gustos do usuario, gardar partidas en iCloud e xogarse coa nosa música favorita de fondo (para o que temos que crear unha listaxe de reprodución titulada VICECITY e seleccionando no xogo a emisora de radio Pletina).
O lanzamento deste xogo tamén inclúe a un número limitado de dispositivos con Android, aínda que no momento de escribir estas liñas o xogo desaparecera de Google Play, onde estivo presente durante uns momentos, pero eliminouse da tenda de aplicacións ao detectarse fallos que tardarán uns días en corrixirse.

O xogo para iOS presenta gráficos mellorados para tirar proveito das pantallas Retina


Trailer do xogo co tema Self Control de Laura Branigan como ambientación musical

PUBLICIDADE