GalegoLab impulsa un novo proxecto para facilitarnos as cousas á hora de xogar en galego

GalegoLab, a plataforma dixital de iniciativas colectivas para promover o galego, segue adiante na súa procura intensiva de espazos onde a lingua xa non se le nin se escoita. Este labor de observatorio do retroceso do galego vense de manifestar unha vez máis coa posta en marcha de LEGA (Lecer Galego), proxecto dirixido a achegarlle á sociedade da nosa terra recursos lúdicos dixitais, xerando contidos baixo licenzas principalmente libres que posibiliten a súa distribución e uso sen barreiras. E todo, como dixemos, facendo fincapé nos ámbitos xeográficos, urbanos case todos eles, onde o galego é xa unha anécdota.
O proxecto, do que daremos máis detalles a semana que vén (con motivo da súa presentación en Santiago, o xoves 12 ás 11.30 horas na Libraría Couceiro),vén da man (entre outras/outros) de Xabier Seixo, o encargado do desenvolvemento de LEGA. Por certo que a cita do xoves contará tamén coa presenza de Carlos Ares e Cani Martínez, membros da xunta directiva de GalegoLab.
Os proxectos cos que LEGA bota a camiñar son os seguintes:
· Galegogym, un CD de música galega, en Creative Commons, para facer fitness en galego, que contou coa colaboración de artistas como GalegoZ, Zimmer 103 e Projecto Mourente.
· Astronomía básica, un recurso de astronomía orientado a seareiros presentes ou futuros da astronomía. “O proxecto”, informa GalegoLab, “consta de material dixital de astronomía, unha guía de astronomía básica e un DVD do sistema operativo Ubuntu en galego, totalmente funcional para usos xenéricos, e modificado de tal xeito que se engaden tanto programas de astronomía en galego de mapas e atlas celestes (Stellarium e Cellestia)”. Tanto o software como navegador ou o procesador de textos e o reprodutor de vídeo están completamente en galego. Cómpre destacar
que é executábel sen instalar. Astronomía básica levouse a cabo en colaboración con Astronomía na Beirarrúa, un proxecto xurdido ao abeiro da Universidade de Santiago e do seu traballo por achegar esta disciplina científica e investigadora á cidadanía, de xeito lúdico e participativo.
· Xogos para ordenador totalmente traducidos ó galego: polo de agora (e agárdanse en breve máis achegas) Frozen Bubble e Childsplay.
· Subtitulado ó galego de Sintel, unha curtametraxe de animación desenvolvida pola fundación Blender.
· Os recursos de todos os proxectos rematados en GalegoLab estarán tamén dispoñibles para a súa descarga.

info portfolio