Galicia Hoxe pecha a súa edición impresa

luns, 27 de xuño do 2011 Marcus Fernández

Galiciahoxe.com manterase en liña pese ao peche da súa edición impresa

O único diario en galego que podemos ver nos nosos quioscos, Galicia Hoxe, dirá adeus este martes, cando menos na súa edición impresa, de xeito que porase fin a unha traxectoria principiada o 17 de maio de 2003, aínda que asegurando que a súa páxina web manterase na Rede (sen detallar se contará con novos contidos, o que parece difícil ao terse en conta que os 19 profesionais que se dedicaban á publicación cesarán no seu posto).
Galicia Hoxe tomara o relevo de O Correo Galego, cabeceira nacida o 6 de xaneiro de 1994 como unha versión en galego de El Correo Gallego, que co novo proxecto tiña unha vocación autonómica, o que supuxo unha importante aposta do Grupo Correo Gallego polos contidos en galego, converténdose no único diario en galego no mercado, o que non tivo a resposta social e institucional agardada, o que, xunto á conxuntura económica actual, levou a este medio á súa fin, seguindo os pasos de publicacións como A Nosa Terra, que hai medio ano tamén cesou a súa edición en papel.
Estamos ante un momento tristemente histórico, no que a nosa lingua esmorece nos quioscos, quedando sen publicacións diarias, e limitándose a publicacións semanais e mensuais, deixando un baleiro que só parece estar a cubrirse axeitadamente dende a Internet, medio no que o galego tamén viviu momentos complicados nos últimos anos.

PUBLICIDADE