Galicia PMS informa aos empresarios galegos que accedan ás axudas TIC deste ano

mércores, 21 de xaneiro do 2009 Raquel Noya

JPEG - 115.7 KB

O portal das pequenas e medianas empresas galegas, Galicia PMS, vén de publicar un artigo con información interesante a ter en conta polos empresarios galegos que desexen solicitar as axudas de Innovación e Industria deste ano en materia de ferramentas para integrarse na Sociedade da Información.
A solicitudes para acceder ás subvencións que lle concede esta Consellaría ás empresas que realicen investimentos durante o ano 2009 en materia de novas tecnoloxías, poden presentarse ata o vindeiro 19 de febreiro e segundo a Axuda de minimis, os empresarios non poderán percibir máis de 200.000 euros en axudas en tres exercicios fiscais.
Os beneficiairos destas contías son as empresas privadas con personalidade xurídica validamente constituídas no momento da presentación da solicitude, que realicen actividades con ánimo de lucro, así como empresarios individuais coa súa sede ou centro de traballo en Galicia.
O importe máximo de subvención por solicitante ascende a 80.000 euros e a 120.000 para as factorías de software certificada CMM nivel 2.
A web Galicia PMS inclúe asemade información sobre as diferentes modalidades de liñas de subvencións, sobre os criterios de valoración das propostas, sobre gastos subvencionables e non subvencionables e sobre os datos de contacto, entre outras cousas.
No artigo tamén se poden consultar as casuísticas para solicitar axudas no eido das infraestructuras tecnolóxicas internas das empresas, aplicacións informáticas nas empresas, apoio ao desenvolvemento do sector TIC e formación técnica e promoción do sector das TIC para o ano 2009.
Estas liñas de actuación conforman a oferta que a Dirección Xeral de Promoción Industrial e da Sociedade da Información da Consellaría de Innovación e Industria puxeron en marcha no comezo do 2009.

PUBLICIDADE