Galicia demanda 1.842 profesionais dixitais, segundo o Mapa de Emprego da Fundación Telefónica

Galicia precisa 1.842 profesionais das Tecnoloxías da Información e a Comunicación (TIC), segundo os datos do Mapa de Emprego da Fundación Telefónica, onde se sinala que a provincia da Coruña lidera en Galicia esta demanda con 751 empregos dixitais sen cubrir na actualidade, seguida de Ourense (714), Pontevedra (283) e Lugo (94). En total falariamos de 1842 novos profesionais. O mapa analiza as ofertas de emprego publicadas nos últimos tres meses nos portais Infojobs, Tecnoempleo, Ticjob e Buscojobs con tecnoloxía baseada en Big Data e Intelixencia Artificial.
Por tipo de oferta, o Mapa de Emprego de Fundación Telefónica revela que os perfís dixitais máis solicitados na provincia da Coruña son o de dixital xestor de proxectos, seguido do de profesional técnico TIC, consultor TIC e administrador de sistemas, mentres que os especialistas IoT (Internet das Cousas) ocupan o último posto da lista.
En canto ás habilidades, as máis solicitadas para desenvolver estes traballos son a linguaxe Java, as tecnoloxías da computación na nube (Cloud Computing), as redes de comunicación e as devasas dixitais para incrementar a ciberseguridade (firewall). Para a clasificación dos postos ofertados, o Mapa de Emprego de Fundación Telefónica utiliza a clasificación europea ESCO (siglas de European Skills, Competences, Qualifications and Occupations), que funciona como un dicionario que describe, identifica e clasifica as ocupacións profesionais, as competencias e as cualificacións relevantes para o mercado laboral, a educación e a formación na UE.
A Fundación Telefónica engade que a dixitalización e a transformación tecnolóxica dispararon a demanda empresarial de perfís tecnolóxicos en Galicia. A comunidade, con 1.842 postos vacantes, ocupa o sexto lugar entre as rexións españolas con máis oferta de emprego dixital. Por diante atópanse Madrid (17.617), Cataluña (12.291), C. Valenciana (3.323), Andalucía (3.305)) e País Vasco (1.915).