Galicia e Colombia afianzan as vías de colaboración no sector TIC
mércores, 18 de maio do 2022
A
Xunta
mantivo este mércores 18 de maio un encontro cunha delegación da
Cámara de Comercio de Bogotá e con varias empresas con sede en
Colombia con vistas a afianzar vías de traballo en común entre
Galicia e este país. A xuntanza, na que participou o conselleiro de
Economía Francisco Conde, produciuse en resposta á misión
comercial que o pasado mes de marzo o Goberno galego encabezou a
Colombia acompañando a medio cento de empresas e clústeres da nosa
terra. Na xeira de traballo deste mércores púxose o foco en
sectores estratéxicos como o naval, o TIC (Tecnoloxías da
Información e a Comunicación), o aeronáutico ou o agroalimentario.
Así,
durante a reunión celebrada na Casa de Galicia Madrid, o
vicepresidente económico tivo ocasión de informar á Cámara de
Comercio de Colombia do inicio das obras da Cidade das TIC na Coruña,
que será unha realidade a principios de 2022 co centro de
fabricación avanzada (4,8M€). Por outra banda, agradeceu á
delegación colombiana que este país vaia participar na próxima
edición de Navalia, que se celebra a vindeira semana en Vigo.
“Xa
temos constituído un grupo de traballo xunto co Ministerio de
Tecnoloxías da Información e as Comunicacións para identificar
elementos de desenvolvemento vinculados co sector da saúde e esa
colaboración vaise estender á industria naval, porque haberá unha
delegación de Colombia que visitará Navalia e iso vai permitir que
esta industria forme parte desa axenda prioritaria de traballo”,
sinalou Conde, quen trasladou á delegación colombiana e tamén ás
nosas empresas “que Galicia segue comprometida ao cen por cento coa
estabilidade e coa xeración dun clima favorábel para a actividade
económica”.