Galiciaconfidencial.com celebra este venres en Compostela o seu décimo aniversario
venres, 8 de novembro do 2013
Finalmente, tal
e como anunciamos os días pasados, o xornal
galiciaconfidencial.com
celebra hoxe o seu décimo ano de vida. E vaino facer, segundo
apuntan dende este medio galego, cunha serie de actividades que
inclúen unha mesa redonda, un acto protocolario e un concerto
de música clásica na Facultade de Xornalismo de Santiago de
Compostela a partir das 19:30 horas do serán. Á cita acudirán non
só persoeiros galegos vencellados á comunicación e ás novas
tecnoloxías da información, senón tamén á política. De feito,
participarán representantes das principais agrupacións políticas
galegas, estando confirmada tamén a presenza do secretario de
Política Lingüística da Xunta, Valentín García, e do secretario
da Real Academia Galega, Henrique Monteagudo.
A celebración dos dez
anos de galiciaconfidencial.com
(que naceu o 28 de outubro de 2003 da man do que hoxe é o director
da canle informativa, Xurxo Salgado), comezará como dixemos ás
19.30 horas. A esta hora está previsto que se desenvolva unha mesa
redonda “sobre o pasado, presente e futuro dos medios en galego en
Internet” na que estarán presentes Rocío Castro, primeira
directora de Vieiros, medio galego pioneiro na rede; Marcus
Fernández, coordinador de Código Cero, o xornal de ámbito
científico e tecnolóxico máis antigo do país; Ubaldo Cerqueiro,
director de Que Pasa na Costa, principal medio dixital da
Costa da Morte, e o decano de Xornalistas de Galicia, Xosé Manuel
Pereiro. Coordinará esta mesa o decano da Facultade de Xornalismo
Xosé Pereira.
A partir das 21.00 horas
terá lugar en Xornalismo unha presentación destes dez anos de
traballo no GC a cargo de Xurxo Salgado e pechará o acto o grupo
musical Herbens Consort con Felipe Rodríguez (frauta), Eliseu Mera
(barítono), Carlos García Amigo (viola da gamba) e Diego Rojo
(arquilaúde). Ao final do acto haberá uns petiscos e un viño.