Galiloxía busca internautas para facer fronte común arredor da tecnoloxía e a ciencia
mércores, 2 de novembro do 2011
Galiloxía,
medio galego do que falamos
recentemente en Código Cero para dar conta da súa participación en Vencello
(rede de blogues temáticos en galego), está
a convocar estes días á comunidade internauta galega, seareira das novas
tecnoloxías e aparellos, para facer fronte común arredor de todas estas cousas
que collen no que probablemente sexa o saco máis amplo de tódolos sacos: o da
Sociedade da Información. En definitiva, do que se trata é de conseguir, coa
axuda da comunidade, a mellora colectiva da propia web Galiloxía, consolidando
un espazo en liña onde se “poda falar de
todo o referente á tecnoloxía, ciencia e arredores, tentando amosar cousas que
non se poden ver todos os días, aparellos curiosos e estraños”, informan os
responsábeis da web.
Por estas e outras razóns, dende Galiloxía están
a procurar persoas ás que lles gusten os trebellos, o outro lado da ciencia, a
ciencia ficción e que teñan devezos por escribir ou aprender a facelo. Do que
se trata, engaden, non é de convocar xente con coñecementos amplos sobre estas
materias, senón internautas que queiran “comezar
a escribir, xente que estea dando os seus primeiros pasos, sinta curiosidade e
queira aprender”.
Quen queira botar unha man pode escribir a
info@galiloxia.com ou pórse en contacto coa xente de Galiloxía a través do twitter ou do facebook.