Gallery TV, o novo televisor de LG con aparencia de cadro

LG Electronics presentará no CES 2026 a súa nova Gallery TV, unha pantalla concibida como lenzo dixital e pensada para integrar a tecnoloxía no deseño de interiores, que competirá directamente cos populares televisores The Frame de Samsung. O dispositivo completa a experiencia de curadoría espacial que a compañía ofrece a través do servizo LG Gallery+, que reúne máis de 4.500 contidos artísticos e visuais.
O novo televisor está orientado a amantes do deseño e busca recrear no fogar unha atmosfera propia dunha galería de arte. Para iso, incorpora un modo Gallery desenvolvido en colaboración con comisarios de museos, que axusta cor e brillo para reproducir con maior fidelidade a textura visual das obras orixinais. A pantalla conta ademais cun tratamento específico para reducir os reflexos e o brillo ambiental, e adapta automaticamente a calidade da imaxe ás condicións de luz do espazo ao longo do día.
A Gallery TV estará dispoñible en tamaños de 55 e 65 polgadas e presenta un deseño delgado, pensado para montaxe a ras da parede, con marcos magnéticos personalizables. Dispón tamén de memoria interna suficiente para que os usuarios poidan almacenar e organizar os seus contidos favoritos. Alén da súa función estética, o televisor ofrece prestacións avanzadas de entretemento grazas á tecnoloxía MiniLED e ao procesador α7 AI, con imaxe 4K e son envolvente AI Sound Pro con configuración virtual 9.1.2.
A experiencia complétase co servizo LG Gallery+, que funciona como plataforma integral de decoración dixital. O catálogo inclúe desde obras de arte clásica ata escenas cinematográficas, contidos de videoxogos e animacións, cunha actualización mensual. Os usuarios poden tamén xerar imaxes propias mediante ferramentas de IA xenerativa ou amosar fotografías persoais, así como engadir música de fondo, tanto a partir de pistas integradas como mediante listaxes de reprodución retransmitidas por Bluetooth.