Gammera Nest, o estudo no que naceu o videoxogo de Tadeo Jones, imparte unha formación no Campus de Ferrol

Gammera Nest, referencial empresa española de desenvolvemento de videoxogos, desenvolve estes días no Campus de Ferrol unha actividade encadrada na súa intensa e continua vertente formativa, estratexia que leva a cabo dende o seu nacemento e 2012 e que se traduce en obradoiros e formacións en institucións e empresas como Medialab, o Museo do Prado ou o Museo Arqueológico Nacional (MAN), sendo agora a quenda da Universidade da Coruña (UDC).
Ao longo desta semana, o alumnado do segundo curso do mestrado en Deseño, Desenvolvemento e Comercialización de Videoxogos, titulación que se imparte na Escola Politécnica de Enxeñaría de Ferrol (EPEF), recibirá unha destas formacións intensivas para mellorar tanto a parte técnica, a artística como o modelo de negocio do seu videoxogo, Renegade Jammer, nado como Traballo Fin de Máster (TFM). Estes obradoiros teórico-prácticos compleméntanse cunha serie de titorías grupais e individualizadas dispoñíbeis ata o mes de setembro.
Entre as persoas expertas que se achegarán estes días ata o Campus Industrial de Ferrol figuran a fundadora de Path Games e directora do Departamento de Marketing en Selecta Play, Virgina Calvo; o director xeral de Sony Interactive Entertainment en Iberia, Mediterráneo, Adriático e Balcáns, Jorge Huguet; a primeira muller que traballou na industria do videoxogos en España e fundadora de Erbe Software e da distribuidora MCM, María Jesús López; a experta en estratexia de negocios e ventas, Fátima Aldama; o director do Programa de Formación PlayStation Talents, Daniel Sánchez; ou o experto en Unreal Engine e fundador de Path Games; Gonzalo Luna.
Ademais de recibir asesoramento para o desenvolvemento do seu videoxogo, o alumnado da Escola Politécnica de Enxeñaría de Ferrol (EPEF) coñecerá os pormenores dalgúns dos proxectos nos que Gammera Nest ten participado dando apoio financeiro e/ou asesoramento técnico completo como poden ser The Many Pieces of Mr. Coo ou Tadeo Jones: La Maldición de la Esmeralda.
En definitiva, esta colaboración tradúcese en formación específica e sesións de titorías para que o alumnado do Campus Industrial de Ferrol poda participar na iniciativa PlayStation Talents, un dos certames máis coñecidos e recoñecidos da industria dos videoxogos en España. Deste xeito, o alumnado opta á posibilidade de que unha das maiores compañías de desenvolvemento de videoxogos, Sony Interactive Entertainment, poda publicar o seu xogo, visibilizalo nas súas campañas de promoción e darlle acceso ás ferramentas de desenvolvemento das súas videoconsolas.
Esta non sería a primeira vez que o alumnado da Universidade da Coruña (UDC), resulta seleccionado para participar neste certame. En decembro de 2023, o xogo Avy, Fábulas da Noite, nado tamén como traballo final do mestrado en Deseño, Desenvolvemento e Comercialización de Videoxogos, conseguiu o galardón ao Xogo coa Mellor Arte na X Edición do Premios iokool PlayStation Talents.