Garmin presenta un monitor de sono con forma de brazalete

Garmin presentou hoxe o Index Sleep Monitor, unha pulseira de sono intelixente e ultralixeira pensada para ofrecer unha visión máis completa da forma física e da recuperación. Cun deseño cómodo que se leva na parte superior do brazo e unha autonomía de ata sete noites, este dispositivo realiza un seguimento continuo de parámetros como a saturación de osíxeno no sangue, a variabilidade da frecuencia cardíaca, o ritmo respiratorio, as fases do sono, o estrés nocturno ou os cambios na temperatura da pel. Ademais, calcula unha puntuación personalizada do sono e proporciona información relevante sobre o estado de saúde ao espertar.
Todos os datos recollidos sincronízanse de maneira automática coa aplicación Garmin Connect, onde poden combinarse cos rexistros dun reloxo conectado compatible. Isto resulta especialmente útil para quen non usa o reloxo durante a noite ou desexa unha análise máis profunda da súa recuperación diaria. O dispositivo tamén permite consultar o nivel de enerxía acumulado, identificar se o sono foi reparador ou estresante, e detectar patróns respiratorios anómalos mentres se dorme. A través do seguimento da temperatura cutánea, tamén se poden obter indicios sobre o ciclo menstrual e mellorar as estimacións de ovulación ou predicións da regra, complementando así as funcións de saúde para mulleres.
Unha das prestacións destacadas do Index Sleep Monitor é a súa alarma intelixente, que analiza as fases do sono e activa unha lixeira vibración no momento máis axeitado dentro da xanela de tempo elixida para un espertar máis natural. A pulseira está dispoñible en dous talles (S-M e L-XL) e pódese lavar facilmente retirando o módulo principal antes de metela na lavadora. Xa está á venda cun prezo recomendado de 169,99 euros.