Gears of War 2 sairá á venda en España o vindeiro día 7 de novembro

Logo de vender máis de 5 millóns de unidades en todo o mundo e revolucionar a industria dos videoxogos con Gears of War, o seu desenvolvedor Cliff Bleszinski, presentaba o pasado día 17 de setembro en Madrid a segunda entrega da saga, o Gears of War 2, que sairá á venda o vindeiro día 7 de novembro en exclusiva para Xbox 360.
Bleszinski asegurou que este lanzamento supón para el “a suma de todo o que leva traballado dende que tiña 17 anos” e que “vai a ser un acontecemento sen igual para Epic como compañía e para el como persoa”.
Gears of War 2 é o resultado dunha coidadosa planificación e do traballo de máis de 100 persoas ao longo de dous anos coa tecnoloxía máis potente do momento, que acadaron unha ambientación moi cinematográfica e que converteron ao xogo nun dos máis populares da historia.
De feito, na pasada edición do E3, a feira máis importante do sector, celebrouse a súa chegada outorgándolle o premio como Mellor Xogo de Acción, galardón que, de seguro, pretenden recoller de novo este ano coa estrea da nova entrega o vindeiro mes de novembro.
O día 7, os xogadores poderán volver a meterse na pel de Marcus Fenix, para facerlle fronte á invasión Locust, no lanzamento “máis agardado do ano”.