Gemini facilita a creación de libros ilustrados personalizados

Google acaba de dar un novo paso na integración da intelixencia artificial coa creatividade persoal coa incorporación dunha funcionalidade que permite crear contos personalizados dentro da súa aplicación Gemini. A través dunha simple descrición, a ferramenta xera libros dixitais de dez páxinas ilustradas, con arte personalizada e narración en voz alta, dispoñibles en máis de 45 idiomas.
A nova opción permite que calquera usuario poida dar forma a unha historia desde cero, elixindo non só o contido, senón tamén o estilo visual: desde pixel art, banda deseñada ou stop motion con plastilina, ata deseños tipo libro para colorear ou simulando labor de gancho. A experiencia é altamente personalizable, xa que é posible incorporar fotografías e arquivos propios como punto de partida ou fonte de inspiración para as ilustracións, dándolle un toque único e íntimo ao resultado final.
O obxectivo non é só o entretemento, senón tamén a aprendizaxe e a educación emocional. Así, un pai pode pedir que Gemini cree un conto que explique o sistema solar a un neno de cinco anos, ou que ensine a importancia da empatía entre irmáns a través dunha historia protagonizada por un elefante, se ese é o animal favorito do seu fillo. Tamén se pode dar vida a debuxos infantís ou transformar as fotos dunha viaxe familiar nunha aventura máxica e inesquecible.
A nova funcionalidade xa está dispoñible a nivel mundial, tanto na versión de escritorio como en dispositivos móbiles, incluso en galego.