Gemini permite transformar fotografías en vídeos con son

Unha semana despois da chegada de Veo 3 a España, Google anuncia o lanzamento dunha nova funcionalidade que permite xerar vídeos dinámicos de oito segundos con son a partir de fotografías estáticas. Esta ferramenta, integrada na aplicación Gemini e na plataforma Flow, inicia a súa despregadura entre os subscritores de Google AI Pro e Ultra.
A nova opción, bautizada como photo-to-video, permite que os usuarios transformen imaxes en vídeos animados simplemente cargando unha fotografía, describindo a escena e engadindo indicacións sobre o son. O sistema xera entón unha pequena peza audiovisual que pode descargarse ou compartirse directamente desde a plataforma. Entre as posibilidades que ofrece están animar obxectos cotiáns, darlle vida a debuxos ou crear escenas naturais en movemento.
Desde maio Veo 3 leva máis de 40 millóns de vídeos creados, tendo aproveitado os usuarios esta tecnoloxía para proxectos tan diversos como reinventar contos tradicionais ou crear vídeos ASMR con sons imaxinativos, como o dunha navalla cortando lava en arrefriamento.
Google asegura manter un compromiso firme coa seguridade dos contidos xerados. Para iso, aplica procesos internos de avaliación, proba os sistemas para detectar usos indebidos e impón políticas contra contido inseguro. Todos os vídeos creados inclúen unha marca de auga visible e unha marca dixital oculta mediante a tecnoloxía SynthID.