God of War III terá versión para PS4

luns, 23 de marzo do 2015 Marcus Fernández

As remasterizacións de xogos da anterior xeración para permitir o seu satisfactorio goce nas novas consolas non parecen querer cesar mentres non contemos cun catálogo de xogos de nova xeración ben nutrido, e o último xogo en confirmar o seu salto de xeración é God of War III, que o 15 de xullo chegará a PlayStation 4, con gráficos a 1080p, combate fluído, armas potentes, temibles inimigos finais... as características propias do xogo de PS3 que como novidade contará cun modo fotográfico que permitirá que compartamos instantáneas dos mellores momentos cos nosos amigos.
Este anuncio chega en plena celebración do décimo aniversario de God of War, que na PlayStation Store percíbese con descontos nos xogos da franquía até o 1 de abril. Deste xeito podemos facernos con God of War: Ascensión por 9,99 euros, a God of War Collection por 12,99 euros, a God of War Collection Volume II por 9,99 euros, God of War HD por 7,99 euros, God of War II HD por 7,99 euros, God of War: Chains of Olympus por 5,99 euros e God of War: Ghost of Sparta por 5,99 euros.


Vídeo no que anuncian God of War III Remastered

PUBLICIDADE