Google TV contará con novas funcións grazas a Gemini

Google vén de anunciar na feira CES 2026 unha nova xeración de funcións baseadas en Gemini que ampliarán as capacidades de Google TV, co obxectivo de facer a experiencia televisiva máis intuitiva, visual e interactiva en dispositivos de distintos fabricantes, incluídos tamén proxectores.
Unha das principais novidades é un novo marco visual enriquecido que adapta as respostas de Gemini ás consultas do usuario mediante imaxes, vídeos e actualizacións deportivas en tempo real. Para cuestións máis complexas, o sistema incorpora funcións de análises en profundidade, con explicacións narradas e interactivas deseñadas para seren comprensibles por toda a familia.
A integración con Google Photos permitirá empregar Gemini para buscar contidos concretos na biblioteca persoal, como persoas determinadas ou momentos específicos. Ademais, será posible aplicar estilos artísticos a través de Photos Remix ou converter recordos en presentacións inmersivas de carácter cinematográfico directamente desde o televisor.
Google tamén confirmou a chegada de ferramentas creativas baseadas en modelos como Nano Banana e Veo, que permitirán reinterpretar fotografías persoais ou xerar contidos audiovisuais orixinais sen saír da pantalla grande.
Outra das melloras anunciadas céntrase na configuración do dispositivo. Os usuarios poderán axustar a imaxe e o son empregando linguaxe natural, con indicacións como «a pantalla está demasiado escura» ou «non se entende ben o diálogo», evitando así navegar por menús complexos mentres se está a ver unha película ou unha serie.
Estas novas funcións de Gemini para Google TV comezarán a chegar en primeiro lugar a dispositivos seleccionados de TCL, antes de estenderse progresivamente a outros equipos compatibles ao longo dos vindeiros meses.