Google facilita indicar os medios preferidos nos resultados de busca

Google vén de activar en España a funcionalidade Fontes favoritas dentro da súa Busca, unha ferramenta pensada para adaptar os resultados informativos aos hábitos de cada usuario. A novidade permite priorizar contidos procedentes de páxinas web seleccionadas previamente, que pasarán a ter maior presenza no bloque de Contidos destacados cando se realicen procuras relacionadas.
Cada persoa poderá escoller os seus medios, blogs ou publicacións de referencia para recibir actualizacións máis acordes cos seus intereses. A partir desa selección, o sistema dará máis visibilidade ás pezas recentes e relevantes deses sitios, aínda que sen excluír outras fontes que tamén poidan achegar información pertinente.
O proceso de configuración intégrase directamente na experiencia de busca. Ao consultar un tema, o usuario pode acceder á opción correspondente dentro de Contidos destacados, seleccionar os medios preferidos e actualizar os resultados para comezar a ver máis contidos procedentes desas páxinas.
As fontes elixidas aparecerán con maior frecuencia, pero seguirán convivindo con outras propostas informativas. A selección pode modificarse en calquera momento, sen límites no número de sitios engadidos.
Desde o punto de vista dos editores, a ferramenta abre a posibilidade de reforzar a relación co público, animando lectores e subscritores a marcar os seus sitios como referencia dentro da Busca de Google mediante os recursos habilitados no seu centro de axuda.