Google incorpora monitorización do sono ao Nest Hub

martes, 16 de marzo do 2021 Marcus Fernández

Hai un par de anos Google decidiu acompañar os seus altofalantes conectados cunha pantalla no seu Nest Hub, produto do que veñen de presentar a súa segunda xeración, que conserva o seu deseño, limitando basicamente a súa actualización a unha mellora da calidade sonora (potencia un 50% máis os graves) e a incorporación dun sensor de movemento Soli para que, se temos colocado o dispositivo no dormitorio poidamos empregalo como monitor da nosa calidade de sono, xa que o Nest Hub analizará os movementos e a respiración da persoa que teña máis preto, o que facilita un seguimento do descanso nocturno sen usar cámara nin unha pulseira, de xeito que pode resultar unha prestación atractiva.
A nivel de prestacións, o Nest Hub ten unha pantalla táctil de 7 polgadas cunha resolución de 1.024 x 600 píxeles, 3 micrófonos de longo alcance (que poden silenciarse e serven para empregar o asistente de Google), un altofalante cun driver de 1,7 polgadas, sensores de movemento, luz ambiental e temperatura, conectividade Wi-Fi 5, Bluetooth 5.0, e tamén integra Chromecast (de xeito que, aparte de contidos de YouTube, Netflix, Disney+, Spotify, Apple Music, Google Photos e outros servizos, tamén pode reproducir contidos de moitas outras fontes).
A prestación de monitorización do sono estará en probas durante todo o ano, para ir mellorando a prestación, e incluso están a explorar a posibilidade de que poida combinarse coa monitorización de sono de Fitbit.
Polo momento, o novo Nest Hub pode reservarse a un prezo de 99,99 dólares en EE.UU., Canadá, Reino Unido, Alemaña, Francia e Australia.

Explicación do funcionamento do sistema de monitorización de sono do Nest Hub

PUBLICIDADE