Google lanza un Chromecast con Google TV económico

Levamos máis de 9 anos gozando dos dispositivos Chromecast para achegar contidos multimedia en liña aos nosos televisores, e hai un par de anos Google revolucionounos incorporándolles Google TV, ou sexa, dotándoos de autonomía, de xeito que xa non precisan dun smartphone ou outro dispositivo para poder controlarse, xa que permiten a instalación de aplicacións e o seu uso con mando a distancia.
O Chromecast con Google TV pode considerarse como a solución ideal para achegar funcionalidades de Smart TV a unha pantalla que careza desas capacidades ou que xa non reciba actualizacións do seu fabricante, aínda que o modelo que tiñamos no mercado resultaba un tanto caro, vendéndose oficialmente a 69,99 euros, de aí que decidisen comercializar un modelo máis limitado, que pode satisfacer a moitos consumidores por simplemente limitarse a reducir a súa resolución de 4K a Full HD, co que conseguen reducir o seu prezo até uns asumibles 39,99 euros.
O Chromecast con Google TV precisa para funcionar unha pantalla con entrada HDMI e acceso á Internet a través de Wi-Fi, facilitando aos usuarios o acceso a contidos multimedia de numerosos servizos en liña e incluso o uso do asistente de Google para o seu manexo e para funcións propias do asistente (como resolver dúbidas e controlar a electrónica doméstica compatible).
Cómpre salientar que a nova versión de alta definición do Chromecast con Google TV conserva o soporte de HDR e tamén é compatible con Google Stadia, de xeito que podería empregarse a xeito de consola de videoxogos na nube de conectarmos cun mando de xogo compatible. A outra limitación que tería o novo modelo de Chromecast sería a súa gama de cores (xa que só estaría dispoñible en cor branca).
Un detalle a ter en conta é que co lanzamento deste novo Chromecast económico deixan de comercializar os anteriores Chromecast que non contaban con Google TV.