Google nega que a IA no seu buscador estea a reducir o tráfico das páxinas web

Ante as acusacións por parte de numerosos medios de que a aposta de Google pola intelixencia artificial está a provocar unha importante perda de tráfico para as súas páxinas web, a compañía de Mountain View responde que a integración da intelixencia artificial no seu buscador está a marcar a maior transformación da experiencia de busca desde a creación do servizo, permitindo ás persoas formular preguntas máis complexas ca nunca e fomentando un maior uso da plataforma.
Segundo os seus datos internos, o volume total de clics orgánicos cara a sitios web desde a busca mantense relativamente estable en comparación co ano anterior. Ademais, a compañía subliña que a calidade media deses clics mellorou, xa que os usuarios mostran maior interese polos sitios aos que acceden.
Google cuestiona informes de terceiros que falan de caídas abruptas no tráfico web, atribuíndo esas conclusións a metodoloxías incorrectas ou a exemplos illados non relacionados coa despregadura da IA. A tecnolóxica explica que, ao facilitar buscas máis longas e específicas, a IA está a xerar máis consultas e a mostrar máis ligazóns nas páxinas de resultados, o que multiplica as oportunidades para que os sitios web sexan visitados.
Con todo, recoñece que as tendencias están a cambiar e que o tráfico pode diminuír nalgúns sitios mentres aumenta noutros. Sosteñen que os usuarios buscan cada vez máis contidos auténticos, como foros, vídeos, podcasts e análises persoais, contexto que beneficia a quen ofrece perspectivas únicas e información de fondo, especialmente en ámbitos como a aprendizaxe, a investigación ou as compras.
Google tamén quixo remarcar que, como empresa centrada na busca, segue comprometida co ecosistema da web. A compañía afirma que os seus sistemas de IA están deseñados para resaltar contido de calidade, con ligazóns visibles, atribucións claras e respecto polas directrices de exclusión de contido da web aberta.