Google recolle as consultas máis destacadas de 2025 en España

Google fixo pública a relación das buscas máis destacadas de 2025 en España, un ano no que a intelixencia artificial non só acaparou interese, senón que tamén transformou a maneira na que formulamos preguntas. As consultas deixaron de centrarse en palabras clave para adoptar un ton máis conversacional, o que levou a que as categorías inclúan cuestións formuladas en primeira persoa, como «como facer» ou «que é mellor».
Como cada decembro, a compañía compila as principais tendencias que definiron o ano, cun abano que abarca cultura pop, estilo de vida, deportes, música e actualidade informativa en arredor de sesenta países. As listaxes recollen aquelas procuras que rexistraron o maior incremento de tráfico en 2025 respecto de 2024, destacando fenómenos exclusivos deste período.
En España, o interese estivo marcado pola inmediatez e pola forte actividade informativa. Termos como «Apagón España» ou «Nuevo Papa» encabezaron as buscas vinculadas á actualidade, xunto con consultas sobre fenómenos meteorolóxicos como «Alerta lluvias» ou «Incendios España». A natureza e a divulgación científica tamén atoparon o seu espazo coa «Migración de la mariposa monarca», que se converteu nun dos termos emerxentes máis destacados.
A curiosidade polas figuras públicas mantívose transversal, combinando referentes do humor como Lalachús, artistas como Rosalía e o impacto deportivo de Ilia Topuria e Carlos Alcaraz. No eido audiovisual, o interese repartíuse entre o cinema de autor e as grandes producións, con Anora —gañadora da Palma de Ouro— e Superman entre as obras máis buscadas. Na televisión, o programa La Revuelta conseguiu facerse un oco nas tendencias do ano.
A intelixencia artificial tivo un papel protagonista non só como obxecto de curiosidade, senón como ferramenta de aprendizaxe. Na categoría «¿Cómo...?», as persoas buscaron desde «Cómo hacer fotos con IA» ata receitas impulsadas por tendencias virais como o «Chocolate de Dubái», as «Crumbl cookies» ou o «Yogur casero». As preocupacións domésticas tamén tiveron presenza con preguntas como «cómo quitar maquillaje de la almohada».
O 2025 foi igualmente un ano de comparacións e toma de decisións. Entre as procuras máis recorrentes apareceron «Gemini o ChatGPT», «Diesel o gasolina», «Amortizar plazo o cuota» ou «Comprar coche o renting». O interese polo coidado persoal e o deporte tamén quedou reflectido en consultas como «retinol o retinal» ou «proteína o creatina». A evolución dos códigos sociais levou a moitas persoas a investigar termos como «Woke», «PEC», «Edadismo» ou «La hora espejo».
As preguntas iniciadas por «por qué» revelaron o desexo de comprender tanto a economía doméstica («por qué suben los huevos») como a internacional («aranceles»), ao tempo que tamén impulsaron a curiosidade por cuestións científicas, desde a escuridade do espazo ata a razón pola que os bostezos se contaxian.
Segundo Google, o 2025 en buscas lembra que detrás de cada consulta hai unha vontade sincera de comprender o mundo e conectar coa actualidade. As listaxes completas poden consultarse en liña e, para unha visión internacional, tamén están dispoñibles en Google Trends.