Gradiant loce tecnoloxías galegas de seguridade na feira mundial Xponential
luns, 29 de abril do 2019
Comezou
finalmente o gran evento internacional da nova tecnoloxía
aeroespacial, a
feira Xponential 2019 de Chicago, e, tal e como sinalamos a
semana pasada dende Código Cero, será
un evento que conte cunha nutrida presenza da nosa terra, para
comezar os impulsores e integrantes do proxecto Civil UAVs
Initiative. Entre as fileiras galegas atópanse centros
tecnolóxicos galegos como o CTAG ou Gradiant, que acode por cuarto
ano consecutivo. Este xa comunicou a súa recalada na feira, un
acontecemento, que, segundo lembra, “é o máis importante do
mundo en materia UAV”, ou sexa, no eido dos vehículos aéreos non
tripulados. O
centro galego está a mostrar as posibilidades e funcionalidades de
Counter UAS, entre o outras tecnoloxías de seu para o ámbito da
seguridade.
Counter
UAS é un sistema automático para a detección, clasificación,
seguimento e neutralización de drons que permite protexer ás
persoas e infraestruturas dentro dun perímetro de seguridade de
diferentes ameazas, como por exemplo as actividades ilegais ou
neglixentes dos vehículos aéreos non tripulados. O sistema, que é
modular, adaptábel a cambios e diferentes contornas e
descentralizado, pode operar de maneira autónoma ou guiada e conta
con catro módulos independentes da gama smart (smartHack,
smartEar, smartEye e smartJam) que poden
empregarse de maneira conxunta ou por separado.
Así
mesmo, Gradiant participará xunto á Xunta de Galicia e as empresas
Indra e Babcock no espazo adicado ao programa Civil UAVs Initiative
(CUI), para contribuír a situar Galicia como un polo de referencia
internacional no segmento dos vehículos non tripulados para uso
civil.
“Xponential
é o evento mundial de referencia no ámbito dos drons e aquí danse
cita todos aqueles axentes que participan deste sector. Na feira,
podemos atoparnos con todos eles e coñecer as súas necesidades”,
indica Iago Gómez, codirector da área de Comunicacións Avanzadas
de Gradiant e asistente ao encontro.
A
maiores de todo o devandito, o equipo de Gradiant dará a coñecer a
súa tecnoloxía de análise intelixente de vídeo para a xestión do
territorio e a vixilancia marítima e terrestre. Nesta ocasión,
Gradiant xunta a súa experiencia en procesado de imaxe e o
coñecemento profundo do ámbito dos drons para desenvolver este
sistema, que amplía a capacidade de resposta dos integradores de
sistemas mediante a incorporación de ferramentas de análise de
vídeo de última xeración ás operacións de vehículos non
tripulados.