Gradiant mostrou en Tecnosec o seu sistema antidrons
venres, 13 de maio do 2022
Gradiant,
o seu socio Grupo TRC e as empresas Proselec e Hispamast, mostraron
as súas últimas innovacións en sistemas antidrons en Tecnosec,
a principal feira estatal de tecnoloxías avanzadas de seguridade e
intelixencia, celebrada en Madrid entre o 11 e o 12 de maio. No marco
deste evento, o centro tecnolóxico vigués debullou as posibilidades
dunha tecnoloxía de seu desenvolvida con Intelixencia Artificial e
combinando dispositivos de radiofrecuencia e optrónica. O sistema
ideado por Gradiant desde 2015 detecta, clasifica e neutraliza
aeronaves non tripuladas, establecendo “un escudo imposíbel de
franquear”, en palabras do centro galego, que explica que a
evolución do seu sistema antidrons, desenvolvido en colaboración co
Grupo TRC e o REW31, implantouse no Exército de Terra baixo o nome
de Proxecto Cervus.
Ademais,
o sistema pode integrarse con outras solucións de detección e
neutralización, como é o caso do inhibidor Repulse proporcionado
por Proselec.
Gradiant
fixo saber que a innovación do sistema antidrons está especialmente
deseñada para o seu uso no ámbito da seguridade en instalacións
como aeroportos, centrais eléctricas, edificios singulares, ou en
eventos con grandes concentracións de persoas (concertos, festivais,
etc.); e para a súa utilización por parte de forzas e corpos de
seguridade. E engadiu: “O sistema achega un novo sistema de
neutralización baseado na inhibición reactiva, capaz de intervir en
drons, cortando a súa capacidade de comunicación e
xeolocalización”. Con esta tecnoloxía, en definitiva, pódese
chegar a capturar e controlar o obxecto para obter información e
provocar a súa aterraxe segura.
A
solución compleméntase co sistema Captive, baseado nun dron cativo,
que aplica capacidades de vixilancia e observación orientadas á
guerra electrónica, tales como GSM, satélite, radiofrecuencia e
inhibición pasiva.