HP Compaq presenta o seu nettop para o mercado asiático

mércores, 26 de novembro do 2008 Marcus Fernández

Os procesadores Intel Atom, popularizados polos ordenadores ultraportátiles de baixo custo, continúan a avanzar para conquistar os escritorios informáticos, e tralos produtos de Asus e MSI agora é a propia HP Compaq a que intenta estrear un nettop, presentando o HP Compaq Mini Q, que contaría con dous modelos, o 2030 e o 2020.
O HP Compaq Mini Q 2030 funcionaría cun procesador Intel Atom 330 de dobre núcleo, con 2 Gb de RAM, disco duro SATA de 160 Gb de 7.200 rpm, gravadora de DVD, lector de tarxetas de memoria e sistema operativo Windows Vista, comercializándose no mercado asiático por 12.900 novos dólares taiwaneses (uns 300 euros) mentres que o modelo inferior, o HP Compaq Mini Q 2020 contaría co popular procesador Intel Atom 270, 1 Gb de RAM, sistema operativo Windows XP e un prezo de 9.900 novos dólares taiwaneses (uns 230 euros).
Non se coñece se HP ten plans para levar estes equipos ao resto do mundo, pero todo apunta a que será así, xa que moitos fabricantes están a apostar por lanzar ordenadores de baixo custo ante a conxuntura económica desfavorable.

PUBLICIDADE