HP ofrecerá tablets e portátiles con Windows 8.1 a prezos económicos

Microsoft prometeu hai uns meses que este outono teriamos no mercado tablets e ordenadores portátiles con Windows 8.1 a prezos moi económicos, e parece que non teremos que agardar a fabricantes chineses para ver tal promesa cumprida, xa que incluso a propia HP está a subir a este carro, anunciando os novos tablets HP Stream 7 e 8 e os portátiles HP Stream con pantalla de tamaño de 11,6 e 13,3 polgadas, que poderán mercarse a prezos moi agresivos.
Os produtos máis destacables son claramente os portátiles HP Stream, que chegan en cores moi rechamantes (azul horizonte e maxenta orquídea) para agradar ao seu público obxectivo (principalmente mozos) e que parten do HP Stream 11, que terá un prezo de só 199,99 dólares, o que está bastante ben para un equipo cun procesador de dobre núcleo e baixo consumo (grazas ao que carece de ventiladores para a súa refrixeración) e cunha autonomía de ata 8 horas e cuarto.

A nivel técnico podemos comentar que funcionan cun procesador Intel Celeron, 2 Gb de RAM, 32 Gb de almacenamento interno (SSD), pantalla de 11,6 polgadas cunha resolución de 1.366 x 768 píxeles, portos USB 2.0 e USB 3.0, saída HDMI, toma de auriculares e lector de tarxetas SD, que poderiamos describilo como un Chromebook con Windows 8.1, e que inclúe coa súa compra 1 ano de Office 365, de xeito que facilita o acceso ás principais aplicacións ofimáticas e a 1 Tb de almacenamento en OneDrive.
Moi semellante é o HP Stream 13, que ten como única diferencia técnica que a súa pantalla medra ata as 13,3 polgadas, de aí que o seu prezo sexa de 229,99 dólares.
Os novos tablets de HP tamén teñen uns prezos moi axustados, e o HP Stream 7, venderase só a 99,99 dólares, incluíndo Windows 8.1 e un ano de Office 365, polo que pode considerarse un xeito moi económico de levar o traballo a todas partes. Para os que queiran un produto cun tamaño un pouco superior tamén estaría o HP Stream 8, que cun prezo de 149,99 dólares non só ofrece un tamaño maior que o HP Stream 7, senón que tamén ofrece 200 Mb de banda larga móbil 4G ao mes nos EE.UU. (supostamente de por vida) polo que resultaría moi atractivo para usuarios que se movan moito e queiran poder dispoñer de acceso á Rede incluso cando están lonxe de conexións Wi-Fi, e sen ter que realizar contratos de telefonía móbil adicionais. Este produtos claramente supoñen unha excelente alternativa para tablets con Android para usuarios profesionais, pois non podemos esquecer que, de conectalos a un rato e un teclado, funcionarían como un ordenador completo.
ACTUALIZACIÓN: HP anunciou os prezos que estes novos equipos terán finalmente en España, de xeito que en novembro poderíamos atopar o HP Stream 11 a un prezo de 229 euros na súa versión básica, 299 euros na súa versión con pantalla táctil e 349 euros engadindo tamén banda larga móbil con HP DataPass. O HP Stream 13 pola súa banda venderíase en decembro a 249 euros no seu modelo Wi-Fi e por 299 euros con banda larga móbil e HP DataPass.
O tablet HP Stream 7 chegaría en decembro a 129 euros, xunto co HP Stream 8, que venderíase por 199 euros con banda larga móbil e HP DataPass.
No caso español, o servizo HP DataPass incluirá 200 Mb de datos móbiles ao mes durante 24 meses sen precisar de contratar ningún servizo con operadores de telefonía (e coa opción de ampliar o servizo con tarifas de baixo custo).