Heaven 17 rexeita a incorporación dun dos seus temas en Grand Theft Auto VI

Heaven 17 publicou o tema Temptation en 1983

O músico Martyn Ware, das bandas británicas Human League e Heaven 17, vén de facer público que Rockstar Games púxose en contacto cos seus editores para negociar a incorporación do tema Temptation en Grand Theft Auto VI, o que parecía unha grande oportunidade, pero que Ware considerou insultante, xa que a oferta económica pola canción foi de 22.500 dólares, sen ofrecer ningunha outra compensación futura.
O membro de Heaven 17 tería que repartir a cantidade ofrecida co resto de integrantes da banda, polo que quedaría con 7.500 dólares, o que considera que é unha cantidade ridícula tendo en conta que Grand Theft Auto V tería superado uns ingresos de 8.600 millóns de dólares.
O que non comenta Martyn Ware é que Rockstar Games non está a suxerir que vai empregar Temptation como sintonía do xogo, senón que o uso que os títulos da saga fai da música licenciada é para poder reproducila como música de fondo, por exemplo, cando se sintoniza a radio mentres se vai nun vehículo, polo que non é unha parte fundamental do xogo (de feito, outras compañías optan por solucións como permitir ligar as radios a contas persoais dos usuarios para que escoiten a música que desexen a través dos servizos que teñan contratados ou da música que teñan no seu propio equipo) e no caso de Grand Theft Auto V o número de cancións incluídas no xogo supera as 500, polo que non parece razoable solicitar unha grande compensación económica cando non estamos ante un xogo musical e o tema vai ter un volume de reproducións bastante limitado.
En calquera caso, a manifestación de indignación por parte de Ware serviu para que un tema musical de 1983 conseguise ter visibilidade hoxe, disparando as súas reproducións en YouTube.