Honor anuncia unha das tabletas máis delgadas do mercado

De cara á celebración do MWC Barcelona a semana que vén xa hai fabricantes adiantando produtos que amosarán alí, como Honor, que entre os seus novos dispositivos contará coa tableta MagicPad 4, que busca chamar a atención co seu grosor de só 4,8 milímetros, mellorando incluso os 5,1 milímetros do iPad Pro ou da Samsung Galaxy Tab S11.
A nova tableta de Honor está equipada cunha pantalla OLED de 12,3 polgadas cunha velocidade de refresco de ata 165 Hz, procesador Qualcomm Snapdragon 8 Gen 5, 12/16 GB de RAM, 256/512 GB de almacenamento interno, cámara traseira de 13 Mpíxeles, cámara frontal de 9 Mpíxeles, 8 altofalantes para achegar unha experiencia sonora envolvente, batería de 10.100 mAh para ofrecer unha magnífica autonomía e cun peso de 450 gramos (moi próximo ao iPad Pro de 11 polgadas).
Falta agora por saber o prezo que terá e a súa data de lanzamento, que previsiblemente se desvelarán na conferencia de prensa que Honor celebrará o vindeiro domingo.